Тогтоол №4465

ХЭРГИЙН ТАНИЛЦУУЛГА: Эрүүгийн хуулийн 148.4-д заасан бусдын эд хөрөнгийг залилан мэхэлж авсан хэргээр шүүгдэгчийг цагаатгасан анхан шатны шүүхийн тогтоолд прокурор эсэргүүцэл гаргасан. АНХАН ШАТ: Шүүгдэгчийг гэмт хэргийн шинжгүй гэх үндэслэлээр хэргийг хэрэгсэхгүй болгож, цагаатгасан. ДАВЖ ЗААЛДАХ ШАТ: Прокурор: Шүүгдэгч залилан мэхлэх зорилгоор зохимол байдал бий болгож, бусдыг төөрөгдүүлэн хохирол учруулсан нь тогтоогдсон, анхан шатны шүүхийн дүгнэлт хууль зүйн үндэслэлгүй, хэргийн бодит байдалтай нийцээгүй тул тогтоолыг хүчингүй болгож хэргийг дахин хэлэлцүүлэхээр буцаах ёстой. Өмгөөлөгч: Мөрдөн байцаалт, шалгалтаар гэм буруу, хохирлын хэмжээ тогтоогдоогүй, шүүгдэгчийг нэг талыг барьж шалгасан тул прокурорын эсэргүүцлийг хэрэгсэхгүй болгож, цагаатгах тогтоолыг хэвээр үлдээх ёстой.

ҮНДЭСЛЭЛ: Давж заалдах шатны шүүхээс хэргийг бүхэлд нь хянан үзэж, анхан шатны шүүхийн шийдвэр нь гэм буруугүйд тооцох зарчимд нийцсэн, сэжигтэн, яллагдагч, шүүгдэгчийн гэм буруутай эсэхэд эргэлзээ гарвал түүнийг ашигтайгаар шийдвэрлэх хуулийн заалтаар хийгдсэн байна. Шүүгдэгч нь хохирогчтой харилцан тохиролцож, өмнө нь хэд хэдэн удаа цагаан будаа авч байсан, сүүлд шилжүүлсэн мөнгийг нь хохирогч өмнөх өрөндөө суутгаж авсан нь тогтоогдож байсан тул залилан мэхлэх гэмт хэргийн шинж тогтоогдохгүй гэж үзжээ. Прокурорын зүгээс ямар үйлдлээр залилсан нь тодорхойгүй, нотлох баримт хангалтгүй, хохирлын шинж чанар, хэмжээ тодорхойгүй, гэрээ хэлцлийн улмаас үүссэн маргаан гэж үзэх үндэслэлтэй байсан тул прокурорын эсэргүүцлийг хүлээн аваагүй. Харин анхан шатны шүүхийн цагаатгах тогтоолын тогтоох хэсэгт үндэслэл болгосон хуулийн зүйл заалтыг тодорхой болгож, зөвтгөвөл зохино гэж дүгнэсэн.