Тогтоол №4325

ХЭРГИЙН ТАНИЛЦУУЛГА: Тээврийн хэрэгслийн жолооч нь хөдөлгөөний аюулгүй байдлын тухай хууль, холбогдох актыг зөрчин хохирогчид хүндэвтэр хохирол учруулсан хэрэг. Анхан шатны шүүх хэргийг хохирлын нотлох баримтыг шүүх хуралдаанаар нөхөн гүйцэтгэх боломжгүй гэх үндэслэлээр прокурорт буцаасан.

АНХАН ШАТ: Хэргийг Эрүүгийн хэрэг хянан шийдвэрлэх тухай хуулийн 33.3 дугаар зүйлийн 1 дэх хэсгийн 1.2-т заасан "шүүх хуралдаанаар нөхөн гүйцэтгэх боломжгүй мөрдөн шалгах ажиллагааг хийлгэх" үндэслэлээр прокурорт буцааж шийдвэрлэсэн.

ДАВЖ ЗААЛДАХ ШАТ: Прокурор анхан шатны шүүхийн шийдвэрийг Эрүүгийн хэрэг хянан шийдвэрлэх тухай хуулийг буруу хэрэглэсэн, тухайлбал, 17.4, 17.5, 36.3 дугаар зүйлүүдийг зөрчсөн хэмээн эсэргүүцэл гаргасан. Хохирогчийн өмгөөлөгч прокурорын эсэргүүцлийг дэмжсэн. Шүүгдэгчийн өмгөөлөгч анхан шатны шүүхийн шийдвэрийг хууль зүйн үндэслэлтэй гэж үзсэн.

ҮНДЭСЛЭЛ: Давж заалдах шатны шүүхээс анхан шатны шүүгчийн захирамж нь хууль ёсны болон үндэслэл бүхий байх шаардлагыг хангаагүй гэж үзсэн. Учир нь, Эрүүгийн хэрэг хянан шийдвэрлэх тухай хуулийн 36.3 дугаар зүйлд зааснаар шүүх шийтгэх тогтоол гаргахдаа иргэний нэхэмжлэлийг үндэслэл, хэмжээг харгалзан шийдвэрлэх, эсхүл хэрэгсэхгүй болгох, эсвэл иргэний журмаар шийдвэрлүүлэхээр шилжүүлэх боломжтой байтал хэргийг прокурорт буцаасан нь хууль зүйн үндэслэлгүй болсон. Мөн 17.5 дугаар зүйлд заасан хялбаршуулсан журмаар хянан шийдвэрлүүлэх хэрэгт урьдчилсан хэлэлцүүлэг хийх боломжгүй, 72 цагийн дотор хэргийг шийдвэрлэхээр хуульчилсэн байхад энэ байдлыг зөрчсөн. Иймд прокурорын эсэргүүцлийг хүлээн авч, анхан шатны шүүгчийн захирамжийг хүчингүй болгож, хэргийг анхан шатны шүүхэд дахин хэлэлцүүлэхээр буцаасан.