Тогтоол №4255

ХЭРГИЙН ТАНИЛЦУУЛГА: Согтууруулах ундаа хэрэглэсэн үедээ тээврийн хэрэгсэл жолоодож, зам тээврийн осол гаргасны улмаас хүний амь нас хохироосон, хүнд гэмтэл учруулсан хэрэг. АНХАН ШАТ: Тээврийн хэрэгслийн хөдөлгөөний аюулгүй байдал, ашиглалтын журам зөрчсөний улмаас бусдын амь нас хохироосон, бие махбодид хүнд гэмтэл учруулсан хэргээр шүүгдэгчийг буруутайд тооцон 4 жил хорих ял оногдуулж, тээврийн хэрэгсэл жолоодох эрхийг 2 жил хасч, ялыг тэнсэн, хянан харгалзахаар шийдвэрлэсэн. ДАВЖ ЗААЛДАХ ШАТ: Хохирогч осол, галын шалтгааныг бүрэн тогтоогоогүй, шүүх хурлыг яарч хийсэн хэмээн гомдол гаргасан. Давж заалдах шатны шүүх шүүгдэгчийн үйлдлийг 2002 оны Эрүүгийн хуулийн 215.3-аас 2017 онд хүчин төгөлдөр болсон Эрүүгийн хуулийн 27.10.3-т шилжүүлэн, хорих ял оногдуулахгүйгээр 4 жил тэнсэж, жолоодох эрхийг 2 жил хасаж, хяналт тавих хугацааг өөрчлөн тогтоожээ.

ҮНДЭСЛЭЛ: Анхан шатны шүүх Эрүүгийн хуулийг буруу хэрэглэсэн. Учир нь, шүүгдэгчийн үйлдсэн гэмт хэргийн шинж шинэ Эрүүгийн хуульд хөнгөн ангилалд багтах болсон бөгөөд ялын доод хэмжээ, тэнсэх боломж өөрчлөгдсөн. Иймд шинэ хуульд нийцүүлэн хэргийн зүйлчлэлийг өөрчилж, шүүгдэгчийн эрх зүйн байдлыг дээрдүүлсэн. Хэрэг хянан шийдвэрлэх ажиллагааны журам зөрчигдөөгүй тул осол, галын шалтгааныг өөрчлөн тогтоолгох хүсэлтийг хэрэгсэхгүй болгосон.