Тогтоол №4213

ХЭРГИЙН ТАНИЛЦУУЛГА: Согтуугаар тээврийн хэрэгсэл жолоодож, явган хүний аминд хүрсэн, ослын газрыг орхиж зугтаасан гэмт хэрэгт холбогдсон этгээдтэй холбоотой эрүүгийн хэрэг.

АНХАН ШАТ: Хөдөлгөөний аюулгүй байдлын тухай хууль тогтоомж зөрчиж, бусдын амь насыг хохироосон, ослын газрыг орхиж зугтаасан гэм буруутайд тооцож, Эрүүгийн хуулийн тусгай ангийн 215 дугаар зүйлийн 215.3-д зааснаар тээврийн хэрэгсэл жолоодох эрхийг 2 жилээр хасч, 3 жил 6 сар хорих ял, мөн хуулийн 216 дугаар зүйлийн 216.2-т зааснаар 2 жил хорих ял оногдуулж, нийт 3 жил 6 сараар ялыг тогтоон, жирийн дэглэмтэй эрэгтэйчүүдийн хорих ангид эдлүүлэхээр шийдвэрлэсэн.

ДАВЖ ЗААЛДАХ ШАТ: Ялтан хэргээ хүлээн зөвшөөрч, учирсан хохирлыг барагдуулсан, биеийн эрүүл мэнд, ар гэрийн байдлыг харгалзан хорих ялыг тэнсэн хянан харгалзах буюу хөнгөрүүлэхийг хүссэн. Өмгөөлөгч анхан шатны шүүхийн шийтгэх тогтоол хууль ёсны болон үндэслэл бүхий бус, Эрүүгийн хуулийн 216 дугаар зүйлийн 216.2 дахь хэсэгт заасан зүйлчлэлийг хэрэгсэхгүй болгуулах, хохирлыг хангалттай нөхөн төлсөн гэж үзэж, ялыг хөнгөрүүлэхийг хүссэн.

ҮНДЭСЛЭЛ: Анхан шатны шүүх хөнгөн ялыг хүнд ялд нь багтааж шийдвэрлэхдээ нэмэгдэл ялыг орхигдуулсан, Эрүүгийн хуулийг буруу хэрэглэсэн. Тээврийн хэрэгслийн өмчлөгчийг иргэний хариуцагчаар тогтоох асуудлыг шүүх шийдвэрлээгүй. Хохирогчийн сэтгэл санааны хохирлын нэхэмжлэлд дүгнэлт хийгээгүй, цаашид нэхэмжлэл гаргах эрхийг дурдаагүй орхигдуулсан нь Эрүүгийн байцаан шийтгэх хуулийг зөрчсөн тул анхан шатны шүүхийн шийтгэх тогтоолыг хүчингүй болгож, хэргийг буцааж шийдвэрлэв.