Тогтоол №3629

ХЭРГИЙН ТАНИЛЦУУЛГА: Ялтай байхдаа бусдын эд хөрөнгө хулгайлж, бие махбодид хөнгөн гэмтэл учруулж, мөрдөн байцаалтаас зайлсхийсэн этгээдтэй холбоотой эрүүгийн хэрэг. АНХАН ШАТ: Ялтан этгээдийг бусдын эд хөрөнгө хулгайлсан, давтан үйлдлээр бусдын бие махбодид хөнгөн гэмтэл учруулсан, мөрдөн байцаалтаас зайлсхийсэн гэмт хэрэг үйлдсэнд буруутайд тооцож, Эрүүгийн хуулийн тусгай ангийн 145.2, 99.2, 261.1 дүгээр зүйлүүдэд зааснаар тус тусын ялуудыг оногдуулж, Ерөнхий ангийн 57.1 дүгээр зүйлийг баримтлан хөнгөн ялыг хүндэд нь багтааж, нийт биечлэн эдлэх ялыг 3 жил 6 сараар тогтоож, учирсан хохирлыг гаргуулж өгөхөөр шийдвэрлэсэн. ДАВЖ ЗААЛДАХ ШАТ: Прокурор анхан шатны шүүхийн шийтгэх тогтоол нь ял багтаах, нэмэх журмыг буруу хэрэглэсэн, гэмт хэргийн нотлох баримтыг тодорхой заагаагүй, давхар ял хүндрүүлэх нөхцөл байдлыг буруу тооцсон, мөрдөн байцаалтаас зайлсхийсэн гэмт хэргийн шинжийг буруу тодорхойлсон үндэслэлээр эсэргүүцэл бичсэн. Давж заалдах шатны шүүхээс прокурорын эсэргүүцэл болон бусад хууль зөрчсөн байдлыг үндэслэн анхан шатны шүүхийн шийтгэх тогтоолыг хүчингүй болгож, хэргийг дахин хэлэлцүүлэхээр анхан шатны шүүхэд буцаахаар шийдвэрлэсэн.

ҮНДЭСЛЭЛ: Анхан шатны шүүх нь Эрүүгийн хуулийн Ерөнхий ангийн 57 дугаар зүйлийг буруу ойлгож хэрэглэсэн, хэд хэдэн гэмт хэрэг үйлдсэн тохиолдолд ял оногдуулах журмыг алдаатай хэрэглэсэн, гэм бурууг нотлох баримтуудыг тодорхой заах хуулийн шаардлагыг хангаагүй, гэмт хэргийн хүндрүүлэх нөхцөл байдлыг буруу тооцсон, гэмт хэргийн шинжийг буруу тодорхойлсон зэрэг хууль зөрчсөн үндэслэлүүдээр давж заалдах шатны шүүх хэргийг буцаасан.