Тогтоол №3475

ХЭРГИЙН ТАНИЛЦУУЛГА: Жолооч нь замын хөдөлгөөний дүрэм зөрчиж, тээврийн хэрэгслийн хурдыг зам, цаг агаарын нөхцөлд тохируулаагүйн улмаас явган зорчигчдыг мөргөж, нэг хүний амь насыг хохироож, нөгөөд нь хүндэвтэр зэргийн гэмтэл учруулсан. Гэмт хэргийг Эрүүгийн хуулийн тусгай ангийн 215.3 дугаар зүйлээр зүйлчилсэн. Шүүгдэгч нь цас, шуургатай, халтиргаатай зам дээр хүн дайрсан бөгөөд гэмт хэрэгтээ гэмшиж, хохирлыг нөхөн төлсөн тул хорих ялыг тэнсэхийг хүссэн.

АНХАН ШАТ: Шүүгдэгчийг тээврийн хэрэгслийн хөдөлгөөний аюулгүй байдлын тухай хууль тогтоомж зөрчиж бусдын амь насыг хохироож, биед нь хүндэвтэр гэмтэл учруулсан гэм буруутайд тооцон, Эрүүгийн хуулийн 215.3 дугаар зүйлээр 3 жил 1 сар хорих ял, 1 жилийн хугацаагаар тээврийн хэрэгсэл жолоодох эрхийг хасах нэмэгдэл ял шийтгэж, урьд авсан бусдын батлан даалтад өгөх таслан сэргийлэх арга хэмжээг цагдан хорихоор өөрчилсөн.

ДАВЖ ЗААЛДАХ ШАТ: Шүүгдэгчийн гаргасан гомдлыг хэлэлцэн, анхан шатны шүүхийн шийтгэх тогтоолыг өөрчилсөн. Учирсан хохирлыг бүрэн барагдуулсан, гэмт хэрэгтээ гэмшсэн, анх удаа хүндэвтэр гэмт хэрэг үйлдсэн, хувийн байдал зэргийг харгалзан, оногдуулсан 3 жил 1 сарын хорих ялыг 1 жилийн хугацаагаар тэнсэж, хянан харгалзахаар болсон. Тээврийн хэрэгсэл жолоодох эрхийг хассан нэмэгдэл ялыг шийтгэх тогтоол хүчин төгөлдөр болсон үеэс эхлэн тоолохоор, цагдан хорих таслан сэргийлэх арга хэмжээг батлан даалтад өгөхөөр тус тус өөрчилж, шүүх хуралдааны танхимаас нэн даруй сулласан.

ҮНДЭСЛЭЛ: Давж заалдах шатны шүүх хэргийг бүхэлд нь хянаж үзээд, шүүгдэгчийг Замын хөдөлгөөний дүрмийн заалтуудыг зөрчсөний улмаас зам тээврийн осол гаргаж, бусдын амь нас, эрүүл мэндэд хохирол учруулсан нь цугларсан нотлох баримтуудаар тогтоогдсон гэж үзсэн. Анхан шатны шүүхийн гэм буруугийн дүгнэлт, ялын зүйлчлэл үндэслэлтэй боловч, шүүгдэгч нь давж заалдах шатны шурдаан болохоос өмнө гэмт хэргийн улмаас учирсан хохирлыг бүрэн нөхөн төлж, хохирогчид гомдолгүй болсон, мөн түүний хувийн байдал, үйлдсэн гэмт хэрэг нь хүндэвтэр төрлийн бөгөөд анх удаа үйлдсэн нөхцөл байдлыг харгалзан, оногдуулсан хорих ялыг биечлэн эдлүүлэх шаардлагагүй гэж дүгнэсэн. Иймд анхан шатны шүүхийн шийтгэх тогтоолд өөрчлөлт оруулж, хорих ялыг тэнсэж шийдвэрлэсэн.