Тогтоол №3068

ХЭРГИЙН ТАНИЛЦУУЛГА: П.Батболд нь согтуурсан иргэнийг цохин, зам руу түлхэж, автомашинд дайруулан амь насыг нь хохироосон гэх хэрэгт, мөн Д.Хатанбүүвэй, Ц.Наранхүү, Ч.Мөнх-Эрдэнэ, О.Урантуяа нар мөрдөн байцаалтад зориуд худал мэдүүлэг өгсөн гэх хэрэгт тус тус холбогдсон. Прокуророос П.Батболдыг Эрүүгийн хуулийн 91.2.15, бусдыг Эрүүгийн хуулийн 254.2-т зааснаар яллах дүгнэлт үйлдэж шүүхэд шилжүүлжээ.

АНХАН ШАТ: Анхан шатны шүүх П.Батболдын хэргийн зүйлчлэлийг Эрүүгийн хуулийн 91.1 болгон хөнгөрүүлж, 11 жил хорих ял оногдуулсан. Д.Хатанбүүвэй, Ч.Мөнх-Эрдэнэ, Ц.Наранхүү, О.Урантуяа нарыг Эрүүгийн хуулийн 254.2-т зааснаар гэм буруутайд тооцож, 3 жил хорих ял оногдуулсан боловч Өршөөлийн хуулиар хэлтрүүлсэн. Мөн П.Батболдоос хохирогчийн ар гэрт оршуулгын болон тэжээгчээ алдсаны нөхөн төлбөр гаргуулахаар шийдвэрлэжээ.

ДАВЖ ЗААЛДАХ ШАТ: Хохирогчийн хууль ёсны төлөөлөгч нь өмгөөлөгчийн хөлс, оршуулгын зарим зардлыг гаргуулаагүйг эсэргүүцсэн бол ялтан П.Батболд болон бусад нь гэм буруугүй, нотлох баримт хангалтгүй, гэрчийн мэдүүлэг зөрүүтэй, хэргийн байдлыг бүрэн тогтоогоогүй гэж анхан шатны шүүхийн шийтгэх тогтолыг эс зөвшөөрч давж заалдах гомдол гаргасан. Давж заалдах шатны шүүх анхан шатны шүүхийн тогтоолыг хүчингүй болгож, хэргийг нэмэлт мөрдөн байцаалт хийлгэхээр прокурорын газарт буцаасан.

ҮНДЭСЛЭЛ: Давж заалдах шатны шүүх анхан шатны шүүхийн тогтоол нь Эрүүгийн байцаан шийтгэх хуулийн 284 дүгээр зүйлд заасан "хууль ёсны ба үндэслэлтэй байх" шаардлагыг хангаагүй гэж дүгнэжээ. Учир нь мөрдөн байцаалтын ажиллагаа бүрэн гүйцэд хийгдээгүй, хэргийн ач холбогдолтой баримтуудад бодитой үнэлэлт өгөөгүй байна. Гэмт хэргийг хэн, хэдийд, хаана, яаж үйлдсэн, сэдэлт, гэм буруугийн хэлбэр, шалтгаан нөхцөл зэргийг Эрүүгийн байцаан шийтгэх хуулийн 80 дугаар зүйлд заасны дагуу бүрэн шалгаж тогтоогоогүй. Зарим гэрчийн мэдүүлгийг бусад нотлох баримттай харьцуулж дүгнэлгүйгээр голлон үзсэн нь өрөөсгөл, тэдний мэдүүлэг нь гэмт хэргийн шалтгаан, санаа, зорилго, гэм буруугийн хэлбэр, оролцоог шууд нотлох эсэх нь эргэлзээтэй байна. Нэмэлт мөрдөн байцаалтаар хохирогчийг автомашинд дайруулсан үйлдлийн шалтгаан, П.Батболдын санаатай түлхсэн эсэх, түүний санаа зорилго, сэдэлт, мөн гэрчүүдийн мэдүүлгийн үнэн бодит байдлыг хөдөлбөргүй тогтоох шаардлагатай байна. Иймд Эрүүгийн байцаан шийтгэх хуулийн 315.1.2-т заасныг үндэслэн хэргийг нэмэлт мөрдөн байцаалтад буцааж, таслан сэргийлэх арга хэмжээг хэвээр үлдээсэн.