Тогтоол №2844

ХЭРГИЙН ТАНИЛЦУУЛГА: Ялтан нь эхнэрийнхээ биед хувийн таарамжгүй харьцаанаас үүдэн тархи доргилт, няцрал, зулгаралт зэрэг хөнгөн гэмтэл санаатай учруулсан үйлдэлд Эрүүгийн хуулийн тусгай ангийн 99.1 дэх хэсэгт зааснаар холбогджээ.

АНХАН ШАТ: Шүүх ялтныг гэм буруутайд тооцож, Эрүүгийн хуулийн тусгай ангийн 99.1 дэх хэсэгт зааснаар хөдөлмөрийн хөлсний доод хэмжээг 5 дахин нэмэгдүүлсэнтэй тэнцэх хэмжээний мөнгөн торгуулийн ял шийтгэсэн. Хохирогч хохирол нэхэмжлээгүй.

ДАВЖ ЗААЛДАХ ШАТ: Ялтны өмгөөлөгч нь хохирогч эвлэрсэн тул хэргийг хэрэгсэхгүй болгох, мөн хэргийн хөөн хэлэлцэх хугацаа дууссан гэсэн үндэслэлээр анхан шатны шүүхийн шийтгэх тогтоолыг эс зөвшөөрч гомдол гаргасан. Прокурор анхан шатны шүүхийн шийдвэрийг хэвээр үлдээх саналтай байсан.

ҮНДЭСЛЭЛ: Давж заалдах шатны шүүх нь хохирогчийн эвлэрсэн тухай хүсэлтийг нотлох баримтын шаардлага хангаагүй гэж үзсэн анхан шатны шүүхийн дүгнэлтийг хууль зүйн үндэслэлтэй хэмээн баталсан. Гэвч ялтны үйлдсэн гэмт хэрэг нь Эрүүгийн хуулийн ерөнхий ангийн 17.1.1 дэх хэсэгт заасан хөнгөн гэмт хэрэгт хамаарах бөгөөд давж заалдах шатны шүүх хуралдаанаар хянан хэлэлцэх үед Эрүүгийн хуулийн ерөнхий ангийн 72.1.1 дэх хэсэгт заасан хөөн хэлэлцэх хугацаа болох зургаан сар өнгөрсөн байсан. Иймд шүүх нь Эрүүгийн байцаан шийтгэх хуулийн 24.1.2, Эрүүгийн хуулийн 72.1.1 дэх хэсэгт заасныг үндэслэн уг гэмт хэргийг хэрэгсэхгүй болгож, ялтныг эрүүгийн хариуцлагаас чөлөөлөхөөр шийдвэрлэж, анхан шатны шүүхийн тогтоолд холбогдох өөрчлөлтийг оруулсан.