Тогтоол №1866

ХЭРГИЙН ТАНИЛЦУУЛГА: Жолооч согтууруулах ундаа хэрэглэсэн үедээ тээврийн хэрэгсэл жолоодож, явган зорчигчийг мөргөж амь насыг нь хохироосон хэрэг. АНХАН ШАТ: Шүүгдэгчийг Эрүүгийн хуулийн тусгай ангийн 215 дугаар зүйлийн 215.3 дахь хэсэгт зааснаар гэм буруутайд тооцож, тээврийн хэрэгсэл жолоодох эрхийг 4 жил хасч, 4 жил 8 сарын хорих ял оногдуулж, чанга дэглэмтэй хорих ангид эдлүүлэхээр шийдвэрлэсэн. Мөн хохиролд 11.917.425 төгрөг гаргуулан хохирогчид олгож, машиныг нь хурааж, хохиролд тооцон олгохоор шийдвэрлэсэн. ДАВЖ ЗААЛДАХ ШАТ: Өмгөөлөгч хүндрүүлэх болон хөнгөрүүлэх нөхцөл байдлыг харгалзахгүй оногдуулсан ял, хохирлын тооцоог буруу хийсэн гэж гомдол гаргасан. Хохирогчийн төлөөлөгч анхан шатны шүүхийн шийдвэрийг хүлээн зөвшөөрсөн. Прокурор ял эдлэх дэглэмийг буруу хэрэглэснийг дурдаж, өөрчлөх санал гаргасан.

ҮНДЭСЛЭЛ: Давж заалдах шатны шүүхээс анхан шатны шүүхийн шийдвэр хууль ёсны, үндэслэлтэй гэж үзсэн. Шүүгдэгч хүнд зэргийн согтолттой байсан, хохирогч жирэмсэн байсан, гэм буруутай үйлдлийн улмаас арилшгүй хор уршиг учирсныг харгалзан ялын хэмжээ, эдлэх дэглэмийг чангаруулсан нь үндэслэлтэй. Хохирлын тооцоо ч мөн нотлох баримтаар тогтоогдсон, хуульд нийцсэн гэж дүгнэж, давж заалдах гомдлыг хэрэгсэхгүй болгосон.