Тогтоол №16027

ХЭРГИЙН ТАНИЛЦУУЛГА: Эрүүгийн хуулийн 12.1 дүгээр зүйлийн 1 дэх хэсэгт заасан хүчиндэх гэмт хэрэгт холбогдсон этгээдийг цагаатгасан анхан шатны шүүхийн тогтоолыг прокурор эс зөвшөөрчээ. АНХАН ШАТ: Гэмт хэргийн шинжгүй гэх үндэслэлээр этгээдийг цагаатгаж, учруулсан хохирлоо нэхэмжлэх эрхийг нь тодорхойлсон. ДАВЖ ЗААЛДАХ ШАТ: Прокурор нь анхан шатны шүүхийн тогтоолын үндэслэл хэргийн бодит байдалтай нийцээгүй, хохирогчийн мэдүүлэг болон шинжээчийн дүгнэлт зэрэг нотлох баримтуудаар гэмт хэргийн шинж тогтоогдсон байхад буруу цагаатгасан гэж үзэн эсэргүүцэл бичсэн. Өмгөөлөгч нь шүүх хууль зүйн үндэслэлтэй, хэргийн бодит байдалд нийцсэн шийдвэр гаргасан гэж үзэж, цагаатгах тогтоолыг хэвээр үлдээхийг хүссэн.

ҮНДЭСЛЭЛ: Шүүгдэгч, хохирогч нарын бэлгийн харилцаанд орсон байдал нь хүчиндэх гэмт хэргийн шинжийг хангаагүй, харилцан тохиролцоотой байсан гэж дүгнэж, анхан шатны шүүхийн цагаатгах тогтоол нь хууль зүйн үндэслэлтэй бөгөөд хэргийн бодит байдалтай нийцсэн байна. Хохирогчийн биеэ хамгаалах, эсэргүүцэл үзүүлэх чадваргүй байсныг нотолж чадаагүй, энэ талаарх мөрдөн шалгах ажиллагаа хангалтгүй хийгдсэн тул эргэлзээ бүхий нөхцөл байдал үүссэн. Гэмт хэрэг үйлдэгдсэн нь нотлогдоогүй, эсхүл шүүгдэгчийн гэм буруутай эсэхэд эргэлзээ гарвал хэргийг хэрэгсэхгүй болгож, цагаатгах зарчмыг баримтлан прокурорын эсэргүүцлийг хэрэгсэхгүй болгож, анхан шатны шүүхийн цагаатгах тогтоолыг хэвээр үлдээсэн.