Тогтоол №15474

ХЭРГИЙН ТАНИЛЦУУЛГА: Хөрөнгө оруулалтын төсөлд хамруулна хэмээн хуурч, зохиомол байдал бий болгон бусдыг төөрөгдөлд оруулж, 21,200,000 төгрөгийн хохирол учруулсан болон олон улсын төслийн зээлд хамруулж өгнө хэмээн хуурч, 10,500,000 төгрөгийн хохирол учруулсан залилах гэмт хэрэгт холбогдсон хэрэг. АНХАН ШАТ: Эрүүгийн хуулийн тусгай ангийн 17.3 дугаар зүйлийн 1 дэх хэсэгт зааснаар Д.Б-г 2 жил хорих ялаар, Г.Г-г 1,000,000 төгрөгөөр торгох ялаар шийтгэж, Д.Б-ийн хорих ялыг зорчих эрх хязгаарлах ялаар сольсон. ДАВЖ ЗААЛДАХ ШАТ: Шүүгдэгч Г.Г-ийн өмгөөлөгчөөс анхан шатны шүүхийн шийтгэх тогтоолыг бүхэлд нь эс зөвшөөрч, Г.Г залилах гэмт хэрэгт хамтран оролцоогүй, гэм буруугүй тул хэргийг хэрэгсэхгүй болгуулах талаар гомдол гаргасан. Прокурор анхан шатны шүүхийн шийдвэрийг үндэслэлтэй гэж үзсэн. ҮНДЭСЛЭЛ: Давж заалдах шатны шүүх хэргийн бүх ажиллагааг хянан үзэж, шүүгдэгч Д.Б, Г.Г нар нь бүлэглэн залилах гэмт хэрэг үйлдсэн болох нь хангалттай нотлогдож тогтоогдсон, тэдний үйлдлийг Эрүүгийн хуулийн тусгай ангийн 17.3 дугаар зүйлийн 1 дэх хэсэгт зааснаар зүйлчилсэн нь хууль зүйн үндэслэлтэй, оногдуулсан ял шийтгэл нь гэмт хэргийн шинж чанар, хэмжээ, гэм буруугийн хэлбэрт тохирсон, Эрүүгийн хуулийг зөрүүтэй хэрэглэсэн, ноцтой зөрчсөн байдал тогтоогдоогүй тул анхан шатны шүүхийн шийтгэх тогтоолыг хэвээр үлдээж, давж заалдах гомдлыг хэрэгсэхгүй болгосон.