Тогтоол №15250

ХЭРГИЙН ТАНИЛЦУУЛГА: Эрүүгийн хуулийн тусгай ангийн 10.1 дүгээр зүйлийн 2 дахь хэсэгт заасан "хохирогчийг биеэ хамгаалж чадахгүй болохыг мэдсээр байж, онц харгис хэрцгийгээр, гэр бүлийн хүчирхийлэл үйлдэж хүнийг алах" гэмт хэрэгт шүүгдэгч холбогдсон. АНХАН ШАТ: Шүүгдэгчийг Эрүүгийн хуулийн тусгай ангийн 10.1 дүгээр зүйлийн 2 дахь хэсгийн 2.1, 2.7, 2.8 дахь заалтаар гэм буруутайд тооцож, 18 жилийн хорих ял оногдуулж, гэм хорын хохиролд 9.424.726 төгрөгийг гаргуулж хохирогчийн хууль ёсны төлөөлөгчид олгуулахаар шийдвэрлэв. ДАВЖ ЗААЛДАХ ШАТ: Шүүгдэгч ял хөнгөрүүлэхийг хүссэн боловч анхан шатны шүүхээс оногдуулсан ял хэм хэмжээнд нийцсэн хэмээн прокурор үзсэн. Хохирогчийн хууль ёсны төлөөлөгч ял хөнгөрүүлэх үндэслэлгүй хэмээн үзэж, анхан шатны шийтгэх тогтоолыг хэвээр үлдээхийг хүсэв.

ҮНДЭСЛЭЛ: Гэр бүлийн хамаарал бүхий харилцаатай хамтран амьдрагчаа согтуу, биеэ хамгаалж чадахгүй байхад нь онц харгис хэрцгийгээр зодсоны улмаас хүнд гэмтэл учруулж, амь насыг нь хохироосон гэмт үйлдлийг Эрүүгийн хуулийн холбогдох зүйл, хэсгүүдэд зүйлчлэн, хуулийг зөв тайлбарлан хэрэглэсэн нь тогтоогдож байна. Гэм хорын хохирол төлсөн нь ял хөнгөрүүлэх нөхцөл байдал болох нь тогтоогдож, шүүгдэгчээс учирсан хохиролд 9.424.726 төгрөгийг хохирогчийн хууль ёсны төлөөлөгчид төлсөн байна. Гэм буруугийн хэлбэр, нийгмийн аюулын шинж чанар, хэмжээг харгалзан оногдуулсан ялыг 17 жил болгон хөнгөрүүлэв.