Тогтоол №14700

ХЭРГИЙН ТАНИЛЦУУЛГА: Сэтгэцэд нөлөөт бодис агуулсан ургамлыг хууль бусаар бэлтгэж, хадгалж, бусдад өгсөн хэргээр шүүгдэгчийг анхан шатны шүүхээс тэнссэн ялтай шийтгэсэн. АНХАН ШАТ: Шүүгдэгчийг сэтгэцэд нөлөөт бодис худалдах зорилгогүйгээр хууль бусаар бэлтгэсэн, хадгалсан, бусдад өгсөн гэм буруутайд тооцож, Эрүүгийн хуулийн ерөнхий ангийн 7.1, 7.3-р зүйлээр 2 жилийн хугацаагаар тэнсэж, согтууруулах ундаа, мансууруулах бодис хэрэглэхийг хориглох хязгаарлалт тогтоосон. ДАВЖ ЗААЛДАХ ШАТ: Прокурор анхан шатны шүүхийн шийтгэх тогтоол нь хууль ёсны болон үндэслэл бүхий байх шаардлагад нийцээгүй, Эрүүгийн хэрэг хянан шийдвэрлэх тухай хуулийг ноцтой зөрчсөн үндэслэлээр эсэргүүцэл гаргав. Эсэргүүцэлд: Шүүгдэгч үйлдсэн гэмт хэргийг Эрүүгийн хуулийн тусгай ангийн ямар зүйл хэсэгт хамаарч байгааг тодорхой заагаагүй, мөн үйлдсэн хэргийн нийгмийн аюулын шинж чанар, хор уршиг, гэм буруугийн хэлбэрт тохироогүй шударга бус ял оногдуулсан гэж дурдсан.

ҮНДЭСЛЭЛ: Давж заалдах шатны шүүхээс прокурорын эсэргүүцлийн зарим хэсгийг хүлээн авч, анхан шатны шүүхийн шийтгэх тогтоолын тогтоох хэсэгт шүүгдэгч Ч.Б-г Эрүүгийн хуулийн тусгай ангийн 20.7 дугаар зүйлийн 1.д заасан гэмт хэрэг үйлдсэнийг тодорхой зааж, дараа нь тэнсэх заалтыг баримтлан ял оногдуулах нь Эрүүгийн хэрэг хянан шийдвэрлэх тухай хуулийг зөрчсөн байх тул тогтоох хэсэгт Эрүүгийн хуулийн тусгай ангийн 20.7 дугаар зүйлийг нэмж оруулж, тогтоолоо өөрчлөн баталсан.