Тогтоол №13992

ХЭРГИЙН ТАНИЛЦУУЛГА: Т.С нь согтууруулах ундааны зүйл хэрэглэсэн үедээ тээврийн хэрэгсэл жолоодож, замын хөдөлгөөний дүрмийг зөрчин, осол гаргаж, зорчигч Ч.У, С.М нарт хүнд, Л.Э-д хүндэвтэр хохирол учруулсан хэрэг. АНХАН ШАТ: Шүүгдэгч Т.С-ийг Эрүүгийн хуулийн тусгай ангийн 27.10 дугаар зүйлийн 2 дахь хэсэгт зааснаар гэм буруутайд тооцож, тээврийн хэрэгсэл жолоодох эрхийг 2 жилээр хасч, 1 жил 6 сараар хорих ял оногдуулан, Өршөөл үзүүлэх тухай хуулиар хорих ялыг нь өршөөв. Хохирогчдын эмчилгээний зардлын нэхэмжлэлийг хэлэлцэхгүй орхиж, иргэний журмаар шийдвэрлүүлэх эрхийг нээлттэй үлдээв. ДАВЖ ЗААЛДАХ ШАТ: Хохирогчийн өмгөөлөгчид хэргийн нөхцөл байдал, хууль зүйн дүгнэлт, Эрүүгийн хуулийг буруу хэрэглэсэн, шийдвэр нь тодорхойгүй, шүүх хуралдаанд ач холбогдол бүхий нөхцөл байдлыг тогтоолгох, дүгнэлтэд ноцтой нөлөөлж болох байдлыг анхаарч үзэлгүй хүсэлтийг хангахаас татгалзсан зэрэг үндэслэлээр давж заалдах гомдол гаргав. Прокурор анхан шатны шүүхийн шийдвэр хэргийн үйл баримтыг зөв тогтоож, бодит байдалд нийцсэн дүгнэлт хийсэн, гэхдээ шийтгэх тогтоолын зарим заалтад техникийн алдаатай тул залруулга хийх хүсэлт гаргав. ҮНДЭСЛЭЛ: Давж заалдах шатны шүүх нь хэргийн бүх ажиллагаа, шийдвэрийг хянан үзээд, давж заалдах гомдлыг үндэслэлтэй гэж үзэж, анхан шатны шүүхийн шийтгэх тогтоолыг бүхэлд нь хүчингүй болгон хэргийг прокурорт буцаахаар шийдвэрлэв. Үүнд, иргэний нэхэмжлэгч, иргэний хариуцагч, тэдгээрийн төлөөлөгч нарын эрх зүйн байдал тодорхойгүй байхад хэргийг шийдвэрлэсэн, үйлдвэрлэлийн ослоор бүртгэгдсэн хэргийн талаарх зарим баримт дутуу, хохирогчийн биед дахин мэс ажилбар хийгдэх шаардлагатай, эрүүл мэндээрээ бүрэн эдгээгүй байдал тогтоогдсон, прокурорын залруулга хийх хүсэлтийг хэлэлцсэн тэмдэглэл авагдаагүй, шүүхийн шийдвэрийг залруулсан тухай шийдвэрт алдааг хэрхэн залруулсныг тусгаагүй зэрэг Эрүүгийн хэрэг хянан шийдвэрлэх тухай хуулийг ноцтой зөрчсөн байдлууд нь шийдвэрт нөлөөлсөн гэж үзжээ.