Тогтоол №12576

ХЭРГИЙН ТАНИЛЦУУЛГА: Мансууруулах болон сэтгэцэд нөлөөт бодисыг хууль бусаар олж авч, хадгалсан, худалдсан хэрэг. АНХАН ШАТ: Шүүгдэгч Б.Б-, Н- нарыг худалдаалах зорилгогүйгээр мансууруулах бодис хууль бусаар хадгалсан хэргээр гэм буруутайд тооцож, 3 жилийн хугацаагаар хорих ял оногдуулахгүйгээр тэнсэж, шийдвэрлэсэн. Шүүгдэгч У.А-, Л- нарт Эрүүгийн хуулийн тусгай ангийн холбогдох зүйлчлэлээр хорих ял оногдуулсан. ДАВЖ ЗААЛДАХ ШАТ: Прокурор анхан шатны шүүхийн шийдвэр нь хэргийн бодит байдалтай нийцээгүй, үндэслэл муутай гэж эсэргүүцэл бичсэн. Шүүгдэгч Н--н өмгөөлөгч уг хэргийг хэрэгсэхгүй болгуулах, цагаатгуулах талаар гомдол гаргасан.

ҮНДЭСЛЭЛ: Анхан шатны шүүх хэргийн бодит байдлыг тогтоохдоо нотлох баримтуудыг хангалтгүй үнэлсэн. Ялангуяа шүүгдэгч Б.Б-, Н- нарын үйлдлийг худалдаалах зорилгогүйгээр хадгалсан гэж дүгнэн хөнгөрүүлж шийдвэрлэсэн нь үндэслэлгүй. Мансууруулах бодисын хэмжээ, савлагаа, шүүгдэгч Б.Б-ын урьд ял шийтгэгдэж байсан байдал, шүүгдэгч Н--н гэм буруугаа хүлээн зөвшөөрөөгүй зэргийг харгалзахгүйгээр оногдуулсан ял нь шударга ёсны зарчимд нийцээгүй. Гэмт хэрэг үйлдсэн нь тогтоогдсон хүмүүст оногдуулах ял нь тэдний үйлдсэн хэргийн нийгмийн аюулын шинж чанар, хэмжээ, гэм буруугийн хэлбэрт тохирсон байх ёстой. Иймд давж заалдах шатны шүүх анхан шатны шүүхийн шийтгэх тогтоолыг хүчингүй болгож, хэргийг дахин хэлэлцүүлэхээр анхан шатны шүүхэд буцаасан.