Тогтоол №12575

ХЭРГИЙН ТАНИЛЦУУЛГА: Гэр бүлийн хүчирхийлэл болон бусдын эрүүл мэндэд хөнгөн хохирол санаатай учруулсан хэрэг. АНХАН ШАТ: Гэр бүлийн хүчирхийлэл болон бусдын эрүүл мэндэд хөнгөн хохирол санаатай учруулсан гэм буруутайд тооцон, 720 цаг нийтэд тустай ажил хийлгэх ял оногдуулж, 400,000 төгрөгийг хохирогчид гаргуулж өгөхөөр шийдвэрлэв. ДАВЖ ЗААЛДАХ ШАТ: Прокурор шүүхийн шийтгэх тогтоолд Эрүүгийн хэрэг хянан шийдвэрлэх тухай хуулийн 36.8 дугаар зүйлийн 1.1-д заасан "шүүгдэгч Эрүүгийн хуулийн ямар зүйл, хэсэг, заалтад заасан гэмт хэрэг үйлдсэн гэм буруутай болох"-ыг тусгаагүй нь ноцтой зөрчил хэмээн үзэж эсэргүүцэл бичив. Давж заалдах шатны шүүх прокурорын эсэргүүцлийг хангаж, шийтгэх тогтоолын тогтоох хэсэгт шүүгдэгч Эрүүгийн хуулийн тусгай ангийн 11.6 дугаар зүйлийн 2-т заасан хүний эрүүл мэндэд хөнгөн хохирол санаатай учруулсан гэмт хэрэг үйлдсэн гэм буруутайг нэмж өөрчлөв. ҮНДЭСЛЭЛ: Анхан шатны шүүхийн шийтгэх тогтоолд Эрүүгийн хэрэг хянан шийдвэрлэх тухай хуулийн 36.8 дугаар зүйлийн 1.1-д заасан шүүгдэгчийг гэм буруутайд тооцохдоо ямар зүйл, хэсэг, заалтад заасан гэмт хэрэг үйлдсэн гэм буруутай болохыг тодорхой бичээгүй нь Эрүүгийн хэрэг хянан шийдвэрлэх тухай хуулийн 39.8 дугаар зүйлийн 1.6-д заасан Эрүүгийн хэрэг хянан шийдвэрлэх тухай хууль ноцтой зөрчилд хамаарна.