Тогтоол №12300

ХЭРГИЙН ТАНИЛЦУУЛГА: Хориглосон мансууруулах болон сэтгэцэд нөлөөт бодисыг худалдаалах зорилгогүйгээр хууль бусаар олж авсан, хадгалсан, мөн хууль бусаар бэлтгэхийг завдсан хэрэгт хоёр хүнд холбогджээ. АНХАН ШАТ: Шүүгдэгч нарыг гэм буруутайд тооцож, нэг жилийн хорих ял оногдуулсан. ДАВЖ ЗААЛДАХ ШАТ: Шүүгдэгч нарын өмгөөлөгч ял хөнгөрүүлэх, зарим хуулийн зүйл заалтыг хэрэглэхгүй гэж үзэн гомдол гаргав. Давж заалдах шатны шүүх анхан шатны шүүхийн шийтгэх тогтоолын зарим хэсгийг өөрчилж, гомдлыг хэрэгсэхгүй болгосон.

ҮНДЭСЛЭЛ: Мансууруулах бодисыг хууль бусаар олж авах гэдэг нь тухайн бодисыг худалдан авах, гүйцэтгэсэн ажил болон үзүүлсэн тусламж үйлчилгээний хариу төлбөрийн хэлбэрээр авах, өр төлбөрт тооцож авах, өөр бараа, эд зүйлээс сольж авах, зээлж авах, бэлгэнд авах зэргээр хариу төлбөртэй эсхүл хариу төлбөргүйгээр өөрийн мэдэлд шилжүүлэн авч байгаа аливаа идэвхтэй үйлдлийг ойлгоно. Шүүгдэгч нар нь сэтгэцэд нөлөөт бодис агуулсан ургамлыг хууль бусаар түүж бэлтгэсэн нь гэмт хэргийн шинжийг бүрэн хангасан, тэдний үйлдсэн хэргийг худалдаалах зорилгогүйгээр хууль бусаар бэлтгэсэн, хадгалсан, хууль бусаар бэлтгэхийг завдсан гэмт хэрэгт тооцох нь зүйтэй. Эрүүгийн хуулийн ерөнхий ангийн 6.7, 7.1 дүгээр зүйлд заасан хорих ялыг хөнгөрүүлэх, чөлөөлөх, тэнсэх зохицуулалт нь шүүх заавал хэрэглэх албатай бус, харин хэрэглэж болох зохицуулалт бөгөөд хэргийн нөхцөл байдал, учирсан хохирлыг харгалзан хэрэглэгдэнэ.