Тогтоол №11806

ХЭРГИЙН ТАНИЛЦУУЛГА: Согтуу, жолоодох эрхгүй этгээд хурд хэтрүүлж, зам тээврийн осол гаргаж, зорчигчид хүнд хохирол учруулсан хэргээр буруутгагдсан. АНХАН ШАТ: Тээврийн хэрэгсэл жолоодох эрхгүй, согтууруулах ундааны зүйл хэрэглэсэн үедээ зам тээврийн хөдөлгөөний аюулгүй байдлын тухай хууль, түүнд нийцүүлэн гаргасан захиргааны хэм хэмжээний актыг зөрчсөний улмаас хүний эрүүл мэндэд хүнд хохирол учруулсан гэмт хэрэг үйлдсэн гэм буруутайд тооцож, Эрүүгийн хуулийн тусгай ангийн 27.10 дугаар зүйлийн 2 дахь хэсгийн 2.1, 2.2, 2.3 дахь заалтад зааснаар хорих ял оногдуулахгүйгээр 2 жилийн хугацаагаар тэнсэж, тодорхой үүрэг хүлээлгэсэн. ДАВЖ ЗААЛДАХ ШАТ: Дээд шатны прокурор нь анхан шатны шүүх Эрүүгийн хуулийн ерөнхий ангийн 5.7 дугаар зүйлийн 2 дахь хэсгийг хэрэглээгүй, тусгай ангийн 27.10 дугаар зүйлийн 2 дахь хэсэгт заасан гэмт хэрэгт эрх хасах нэмэгдэл ял оногдуулах хуультай зөрчилтэй шийдвэр гаргасныг эсэргүүцсэн.

ҮНДЭСЛЭЛ: Анхан шатны шүүх Эрүүгийн хуулийг буруу хэрэглэсэн, тодруулбал, Эрүүгийн хуулийн тусгай ангийн 27.10 дугаар зүйлийн 2 дахь хэсэгт заасан гэмт хэрэгт оногдуулахаар заасан тээврийн хэрэгсэл жолоодох эрх хасах нэмэгдэл ялыг хэрэглээгүй нь хууль буруу хэрэглэсэн гэж үзсэн. Мөн гэмт хэргийн нийгмийн аюулын шинж чанар, хэр хэмжээг бодитой үнэлж дүгнээгүй, шударга ёсны зарчимд нийцээгүй шийдвэр гаргасныг тогтоож, шийтгэх тогтоолыг хүчингүй болгон хэргийг анхан шатны шүүхэд дахин хэлэлцүүлэхээр буцаасан.