Тогтоол №10796

ХЭРГИЙН ТАНИЛЦУУЛГА: Замын хөдөлгөөний дүрмийг зөрчиж, явган зорчигчид хүнд хохирол учруулсан хэргээр шүүгдэгч Т.Б-д холбогдох эрүүгийн хэргийг хянан шийдвэрлэсэн. АНХАН ШАТ: Шүүгдэгч Т.Б-г Эрүүгийн хуулийн тусгай ангийн 27.10 дугаар зүйлийн 2.3-т зааснаар жолоодох эрхийг 1 жил хасаж, 1 жил хорих ял оногдуулж, Эрүүгийн хуулийн ерөнхий ангийн 6.7 дугаар зүйлийн 1.1-т зааснаар хорих ялаас чөлөөлж, жолоодох эрх хасах ялыг хэрэг хүчин төгөлдөр болсноос тоолохоор шийдвэрлэсэн. ДАВЖ ЗААЛДАХ ШАТ: Прокурор Анхан шатны шүүхийн шийдвэрт Эрүүгийн хуулийн 6.7 дугаар зүйлийг буруу хэрэглэсэн, ял оногдуулаад чөлөөлөх нь хуулийн зохицуулалтад нийцэхгүй хэмээн эсэргүүцсэн. Хохирогчийн өмгөөлөгч Анхан шатны шүүхийн шийдвэрийг хэвээр үлдээхийг хүссэн. Давж заалдах шатны шүүх Анхан шатны шүүхийн шийдвэр Эрүүгийн хуулийн зарчимд нийцээгүй, Эрүүгийн хариуцлага нь үйлдсэн гэмт хэрэг, нийгмийн аюулын шинж чанар, хэр хэмжээ, гэм буруутай байдалд тохироогүй гэж үзэн шийдвэрийг бүхэлд нь хүчингүй болгож, хэргийг дахин хэлэлцүүлэхээр буцаасан.

ҮНДЭСЛЭЛ: Эрүүгийн хуулийн ерөнхий ангийн 6.7 дугаар зүйлийн 1.1 дэх хэсэг нь ял оногдуулахгүйгээр шууд чөлөөлөх зохицуулалттай болохоос, ял оногдуулаад ялаас нь чөлөөлнө гэсэн зохицуулалт биш. Шүүх ял оногдуулахдаа уг заалтыг зөрчиж, гэм буруугийн хэлбэр, нийгмийн аюулын шинж чанарт тохироогүй шийдвэр гаргасан.