Тогтоол №10771

ХЭРГИЙН ТАНИЛЦУУЛГА: Бүлэглэн, мотоцикль ашиглан олон тооны малыг хулгайлсан хэрэг. АНХАН ШАТ: Шүүгдэгчдийг бүлэглэн, мотоцикль ашиглан бусдын олон тооны малыг хулгайлсан гэм буруутайд тооцож, Эрүүгийн хуулийн тусгай ангийн 17.12 дугаар зүйлийн 2 дахь хэсэгт зааснаар нэг шүүгдэгчийг 2 жил, нөгөөг 1 жилийн хорих ялаар шийтгэж, ашигласан тээврийн хэрэгслийн үнийг улсын орлогод оруулсан. ДАВЖ ЗААЛДАХ ШАТ: Шүүгдэгч ял хөнгөрүүлэхийг хүссэн. Давж заалдах шатны шүүх анхан шатны шийтгэх тогтоол нь хууль ёсны бөгөөд үндэслэл бүхий байна гэж үзэж, гомдлыг хүчингүй болгож, шийтгэх тогтоолыг хэвээр үлдээсэн.

ҮНДЭСЛЭЛ: Шүүгдэгч нь удаа дараа мал хулгайлах гэмт хэрэгт холбогдож, ял шийтгэлээс хойшлуулах, тэнсэх зэргээр нийгэмшүүлэх боломж олгогдсон боловч дахин санаатай гэмт хэрэг үйлдсэн нь хувийн зан араншин, амар хялбар аргаар мөнгө олох гэсэн гэмт санаа сэдлийн илэрхийлэл бөгөөд гэм буруугаа бүрэн ухамсарлаж гэмшээгүй, засарч хүмүүжээгүй гэж дүгнэсэн. Гэм буруугаа хүлээн зөвшөөрч, хохирлоо барагдуулсан ч урьд нь үйлдсэн хэргүүдийг харгалзан ял хөнгөрүүлэх боломжгүй.