Тогтоол №10359

ХЭРГИЙН ТАНИЛЦУУЛГА: Хууль сахиулагчийн албан үүргээ биелүүлэхтэй холбогдуулан хүч хэрэглэн эсэргүүцэж, биед нь хүндэвтэр хохирол учруулсан хэрэг. АНХАН ШАТ: Хүний эрүүл мэндэд хүндэвтэр хохирол санаатай учруулсан болон хууль сахиулагчийг албан үүргээ гүйцэтгэхтэй нь холбогдуулан хүч хэрэглэн эсэргүүцэж, хууль сахиулах албаны барилга байгууламжид халдаж үйлдсэн хэргүүдэд гэм буруутайд тооцож, нийт 7,000,000 төгрөгөөр торгох ял оногдуулсан. ДАВЖ ЗААЛДАХ ШАТ: Прокурор болон өмгөөлөгчид хүний эрүүл мэндэд хүндэвтэр хохирол учруулсан хэргийн хөөн хэлэлцэх хугацаа өнгөрсөн гэх үндэслэлээр гомдол гаргасан. Давж заалдах шатны шүүхээс хөөн хэлэлцэх хугацаа нь өнгөрсөн гэж үзэн, хүний эрүүл мэндэд хүндэвтэр хохирол учруулсан хэргийг хэрэгсэхгүй болгож, оногдуулсан ялыг хүчингүй болгосон. ҮНДЭСЛЭЛ: Эрүүгийн хуулийн 1.10 дугаар зүйлийн 1.1-д зааснаар хүний эрүүл мэндэд хүндэвтэр хохирол санаатай учруулсан гэмт хэргийн хөөн хэлэлцэх хугацаа 1 жил байдаг. Шүүх хуулийн зүйлчлэлийг хөнгөрүүлэн өөрчилсөн тохиолдолд шүүгдэгчийн эрх зүйн байдлыг дээрдүүлсэн хуулийн бусад заалтыг хамтад нь хэрэглэх нь хууль ёсны байх зарчимд нийцнэ.