Тогтоол №10033

ХЭРГИЙН ТАНИЛЦУУЛГА: Иргэн нь албан хэрэгцээнд олгосон мотоциклийг худалдан борлуулж, бусдын итгэмжлэн хариуцуулсан эд хөрөнгийг завшсан гэмт хэрэгт холбогджээ. АНХАН ШАТ: Хэргийг хянан хэлэлцээд, нөхөн гүйцэтгэх боломжгүй мөрдөн шалгах ажиллагаа хийлгэх шаардлагатай гэх үндэслэлээр хэргийг прокурорт буцаасан. ДАВЖ ЗААЛДАХ ШАТ: Прокурор анхан шатны шүүхийн журмыг ноцтой зөрчсөн үндэслэлээр эсэргүүцэл гаргасан. Шүүгдэгчийн өмгөөлөгч анхан шатны шүүхийн шийдвэрийг хууль зүйн үндэслэлтэй гэж үзсэн. Давж заалдах шатны шүүх анхан шатны шүүхийн шийдвэрийг эрүүгийн хэрэг хянан шийдвэрлэх ажиллагааны хуульд заасан журмыг ноцтой зөрчсөн гэх үндэслэлээр хүчингүй болгож, хэргийг шүүхийн урьдчилсан хэлэлцүүлгээр дахин хэлэлцүүлэхээр анхан шатны шүүхэд буцаах нь зүйтэй гэж үзсэн.

ҮНДЭСЛЭЛ: Анхан шатны шүүх нь яллагдагчийг шүүхэд шилжүүлсэн байсан бөгөөд гэм буруугийн шүүх хуралдаан хийхээр товлон зарласан байтал, хэрэгт нэмэлт мөрдөн шалгах ажиллагаа хийлгэхээр прокурорт буцаасан нь Эрүүгийн хэрэг хянан шийдвэрлэх тухай хуулийн 36.2 дугаар зүйлийн 1-т заасан "шүүхийн шийдвэр нь шийтгэх, эсхүл цагаатгах хэлбэртэй байна" гэх заалт болон бусад журмыг ноцтой зөрчсөн байна. Яллагдагчийг шүүхэд шилжүүлсэн тохиолдолд нэмэлт ажиллагаа хийлгэхээр прокурорт буцаах нь хууль зүйн үндэслэлгүй бөгөөд ийм тохиолдолд шүүхийн урьдчилсан хэлэлцүүлгээр шийдвэрлэхээр хууль зохицуулсан байна.