Тогтоол №69365

ХЭРГИЙН ТАНИЛЦУУЛГА: Нийтийн албан тушаалтан болох Засаг даргын орлогч хахууль авсан, иргэн хахууль өгсөн хэрэг. АНХАН ШАТ: Эрүүгийн хуулийн тусгай ангийн 22.4 дүгээр зүйлийн 4 дэх хэсэгт заасан гэмт хэрэгт холбогдуулан яллах дүгнэлт үйлдсэн хэргийг хэлэлцэв.

ҮНДЭСЛЭЛ: Шүүгдэгч Т.Эрдэнэбаяр нь хадлан бэлтгэх ажлын хэсгийн даргын үүргээ гүйцэтгэхдээ иргэн А.Мөнхжаргалын ашиг сонирхлын үүднээс албаны чиг үүргээ хэрэгжүүлэхийн тулд 1.000.000 төгрөгийн хахууль авсан. Шүүгдэгч А.Мөнхжаргал нь өөртөө давуу байдал бий болгох зорилгоор дээрх албан тушаалтанд 1.000.000 төгрөгийн хахууль өгсөн. Шүүхээс Т.Эрдэнэбаярт холбогдох хэргийн зүйлчлэлийг Эрүүгийн хуулийн тусгай ангийн 22.4 дүгээр зүйлийн 2 дахь хэсэгт зааснаар өөрчилж, нийтийн албанд томилогдох эрхийг 5 жилийн хугацаагаар хасаж, 5.400.000 төгрөгөөр торгох ял оногдуулсан. А.Мөнхжаргалд Эрүүгийн хуулийн тусгай ангийн 22.5 дугаар зүйлийн 1 дэх хэсэгт зааснаар нийтийн албанд томилогдох эрхийг 2 жилийн хугацаагаар хасаж, 2.700.000 төгрөгөөр торгох ял оногдуулсан. Хахуульд өгсөн 1.000.000 төгрөгийг улсын орлого болгохоор шийдвэрлэв.