ХЭРГИЙН ТАНИЛЦУУЛГА: Согтууруулах ундаа хэрэглэсэн үедээ хувийн таарамжгүй харьцааны улмаас бие биенийхээ эрүүл мэндэд хөнгөн хохирол санаатай учруулсан хэрэг. АНХАН ШАТ: Шүүгдэгч Д.Р, Б.У нарыг Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар хүний эрүүл мэндэд хөнгөн хохирол санаатай учруулсан гэм буруутайд тооцсон.
ҮНДЭСЛЭЛ: Шүүгдэгч Д.Р нь Б.У-г зодож, Б.У нь Д.Р-ийг чулуугаар цохиж, тус тус биед нь хөнгөн хохирол учруулсан болох нь цугларсан нотлох баримтаар тогтоогдсон. Гэмт хэргийн улмаас хохирогч Б.У-д 600,000 төгрөг, Д.Р-д 110,560 төгрөгийн хохирол учирсан байна. Хохирлыг харилцан тооцон, Д.Р-оос 489,440 төгрөгийг гаргуулж Б.У-д олгохоор шийдвэрлэсэн. Шүүгдэгч Б.У-г 500,000 төгрөгөөр, Д.Р-ийг 700,000 төгрөгөөр торгох ял оногдуулж, 4 сарын хугацаанд хэсэгчлэн төлүүлэхээр тогтоосон. Гэмт хэргийн улмаас учирсан бусад хохирлыг иргэний хэрэг шүүхэд хянан шийдвэрлэх журмаар нэхэмжлэх эрхийг нээлттэй үлдээсэн.