Тогтоол №55380

ХЭРГИЙН ТАНИЛЦУУЛГА: Согтууруулах ундааны зүйл хэрэглэсэн үедээ хамтран амьдрагч эмэгтэйн нүд рүү тохойлдон хүнд гэмтэл учруулсан этгээдэд холбогдох хэргийг хянан хэлэлцсэн. АНХАН ШАТ: Гэр бүлийн хүчирхийлэл үйлдсэн, хүндрүүлэх нөхцөл байдалтайгаар хүний эрүүл мэндэд хүнд хохирол санаатай учруулсан үндэслэлээр Эрүүгийн хуулийн тусгай ангийн 11.1 дүгээр зүйлийн 2 дахь хэсгийн 2.1-д заасан гэмт хэрэг үйлдсэнд тооцож, 5 жил 1 сарын хорих ял оногдуулж, нээлттэй хорих байгууллагад эдлүүлэхээр шийдвэрлэсэн.

ҮНДЭСЛЭЛ: Хохирогчийн мэдүүлэг, гэрчүүдийн мэдүүлэг, шүүх эмнэлгийн дүгнэлт, шинжээчийн дүгнэлт, шүүгдэгчийн өөрийн мэдүүлэг болон хэрэгт цугларсан бусад бичгийн нотлох баримтуудаар гэмт хэрэг үйлдсэн нь хангалттай нотлогдсон. Гэр бүлийн хүчирхийлэлтэй тэмцэх тухай хуульд зааснаар хамтран амьдрагч нь гэр бүлийн харилцаанд хамаардаг бөгөөд шүүгдэгч, хохирогч нь гэр бүлийн харилцаа үүсгэн хамтран амьдарч байсан нь тогтоогдсон. Учирсан хохирол, хор уршгийн шинж чанар, хохирогчийн цаашид эмчилгээ хийлгэх шаардлагатай байгааг харгалзан ялыг хөнгөрүүлэх боломжгүй гэж шүүх үзсэн. Шүүгдэгчийн цагдан хоригдсон 76 хоногийг ял эдэлсэн хугацаанд оруулж тооцсон. Хохирогчийн цаашид учирсан эмчилгээний болон ажилгүй байсан хугацааны цалинтай холбоотой нэхэмжлэлийг иргэний журмаар шийдвэрлүүлэхээр тогтоолд дурдсан.