Тогтоол №52385

ХЭРГИЙН ТАНИЛЦУУЛГА: Хоёр хүн бүлэглэн, зохих зөвшөөрөлгүйгээр нэн ховор ургамал болох хонин арц хууль бусаар түүж, тээвэрлэсэн, улмаар байгаль орчинд учруулсан хохирлыг барагдуулахтай холбоотой эрүүгийн хэрэг. АНХАН ШАТ: Эрүүгийн хуулийн 24.8 дугаар зүйлийн 1 дэх хэсэгт заасан гэмт хэрэгт буруутгаж, бүлэглэн, зохих зөвшөөрөлгүйгээр, хуульд зааснаас өөр зорилгоор нэн ховор ургамлыг түүсэн, бэлтгэсэн, тээвэрлэсэн гэм буруутайд тооцож, тус бүрт нь 1 жилийн хугацаагаар зорчих эрхийг хязгаарлах ял оногдуулж, учирсан хохирлыг 5 дахин нэмэгдүүлэн гаргуулж, хураагдсан хонин арцыг улсын орлого болгож шийдвэрлэв.

ҮНДЭСЛЭЛ: Шүүгдэгчид бүлэглэн, байгалийн ургамлын тухай хуулийг зөрчиж, зохих зөвшөөрөлгүйгээр нэн ховор ургамал болох хонин арцыг худалдан борлуулах зорилгоор түүж, бэлтгэж, тээвэрлэсэн нь тогтоогдож, учирсан экологи-эдийн засгийн хохирлыг холбогдох хуулийн дагуу тооцон, шүүгдэгч нарт хариуцлага хүлээлгэхээр шийдвэрлэсэн. Гэм буруугаа хүлээн зөвшөөрч, хохирлоо нөхөн төлөхөө илэрхийлсэн ч, төлөх боломж, хугацаа зэрэг нь тодорхойгүй тул ялыг тэнсэх боломжгүй гэж үзсэн. Зорчих эрхийг хязгаарлах ял оногдуулж, учирсан хохирлыг 5 дахин нэмэгдүүлэн, олсон орлого болох хонин арцыг улсын орлого болгож шийдвэрлэсэн.